1 Corinthians 5

Mua oko-ke sira samora oneya kakeneka wia maakek

1Aria yo feenap nia miimam, ni mua oko ona wiawi emeria enuma wiar aawok. Wi Yeesus teeria-pa me wiar ikemik nain wi sira naap-ko me onimik, weetak akena. Nain os-ke sira samor akena nain onak. 2Naap onak nain ni emina ururemi kema samor maneka ikowa weetakeya ni niena amis maneka niam maemi unuma niam piram-ikaiman. Aa-na mua naap nain iiraremi i teeria-pa me yiar ikainok naekaman aa. 3Makena yo niamiya me ikem, nain yo kema-ke nia wuam-ikaiyem. Naeya yo neeke niar ikowa saarik, mua nain yo feenap maiyem, pina maneka onak. 4Naeya ni feenap oneka, yiena Maneka Yeesus unuma-pa niam aawep woosa kuisow wuap ona unuma kekanowa-pa mua nain Satan wapena-pa wiar wueka. Neeke yoowa aawinok. Yoowa aawep-puap kema kireya ikoka yiena Maneka ekapow fofa neeke ona kukusa wueliwa ikainon. Ne yos pun ni niamiya ikowa saarik ikem, ni naap oneka.

Yeesus teeria sira samora onap emina kekaniwkin wia iirarowa

6Aria ni aakisa unuma niam piriman nain eliw marew. Sira feenap ikua, mua kuisow muuta pina oninon-na, ikoka ni mua unowa pun pina onowen. Fain saarik, emer kuumowa yis gelemuta palauwa-pa wuap onaiya kiripiwkin iiwawun arimiya naap. Oko nis pun pina naap nain onowen. 7Aria i Yuuda Pasowa maapora feenap onimik, amin muupa yasuwap palauwa enuma yis marewa nain neeke kiripap-puap aawep kuumep Pasowa maapora urufimik. Naeya nis pun sira samo-samora iirareka. Pasowa maapora-pa pina iiraru naep sipsip muuka ifakimep Mua Maneka patirimik. Nain Yeesus Krais sipsip saarik ifakimiwkin umemi i pina iiwawun yiar iirarek. Naapeya ni pina marew ikaiman, ni naap ikeka. 8Ne i maapora nain urufowa saarik sira samora iiwawun piipuap kema palanowiw ikaikua. Kema bagiaw irowa marew, wia amukarowa marew, kema meliniw ikok sira makena onam-ikaikua.

9Aria yo iiriw parosifa oko nia siisimomami naap nia maakem, wi enum eruarimik nain wiamiya me soomareka. 10Nain Yeesus teeria mua papako pina naap onimik nain wiamiya me soomareka, nia naem. Aria yo me wi sisin mua wia maem, weetak. Wis-na enum eruarimik, maa wiar ifemakimik. Mua oko wia samorami maa wiar aawimik, wiena inasina ookimik, wi nain wiamiya me ikeka, yo naap-ko me nia maakem. Ni naap baurarowen-na kaanek ikowen? 11Naapeya yo aakisa feenap nia maakiyem, mua eena Yeesus teeria wiar ekap ikok enum eruaruk-na, maa ifemakuk-na, wiena inasina ookuk-na e mua oko opor samo-samora wia onuk-na, eka kekanowa eruaruk-na, mua wia samorami maa wiar aawuk-na wi nain wiamiya me soomareka, maa enowa pun wiamiya me enimeka.

Aria wi sisin mua sira naap onimik nain me yo maa-ke, naeya yos-ke wia mekawinen. Mua Maneka ona maa-ke, ikoka ona wia samorinon. Nain nis-ke wi mua Mua Maneka teeria-pa ikemik nain wia mekawowa-ke. Moram Mua Maneka opora naap wiar siisimep-puamik,

“Ni teeria-pa mua-ko sira samora naap onam-ikainok-na iirareka.”
12(Lo 17.7)